Андижонда «Карантин COVID-19» рухсатномаларини қалбакилаштирган шахслар қўлга олинди

Андижонда коронавирус инфекцияси тарқалишининг олдини олиш мақсадида жорий этилган карантин вақтида транспорт воситаларини бошқаришга рухсат берувчи махсус рухсатномаларни қалбакилаштирган шахслар қўлга олинди. Бу ҳақда ИИВ матбуот хизмати хабар қилди . Тезкор тадбир давомида фуқаро А.Ш. яқин қариндоши А.З. билан бир гуруҳ бўлиб, Андижондаги яшаш хонадонида махсус рухсатномани рангли принтер ёрдамида тайёрлаб, 100 минг сўм эвазига таниши А.У.га бергани ва А.У. томонидан ушбу ҳужжатдан фойдаланган ҳолда ўзига тегишли «Дамас» русумли автомашинасида шаҳар ҳудудида ҳаракатланиб юргани аниқланди. Шунингдек, тезкор тадбир давомида А.Ш.нинг уйидан сохта 7 дона «Карантин COVID-19» махсус рухсатномаси, эски турдаги ҳайдовчилик гувоҳномалари ва талонлари, нотариус томонидан берилган ишончномалар тайёрлаганлиги маълум бўлган ва баённома орқали ашёвий далил сифатида олинган. "Газета.uz"да реклама Мазкур ҳолат юзасидан Олтинкўл тумани ИИБ ҳузуридаги тергов бўлинмаси томонидан А.Ш. ва А.З.ларга нисбатан Ўзбекистон Жиноят кодексининг 168-моддаси 2-қисмининг «б» банди, 228-моддаси 2-қисмининг «б» банди ва 228-моддаси 3-қисми билан жиноят иши қўзғатилиб, Жиноят-процессуал кодекснинг 221-моддаси тартибида вақтинча ушланди. Ҳозирда ушбу ҳолат бўйича дастлабки тергов ҳаракатлари олиб борилмоқда. Маълум қилинишича, А.Ш. муқаддам ҳам сохта ҳужжатларни тайёрлаганлиги учун судланган.

Место для вашей рекламы